ܥܠ ܚܝ̈ܐ ܕܚܣܝܐ ܡܪܝ ܝܘܣܦ ܚܢܢܝܫܘܥ ܡܝܛܪܦܘܠܝܛܐ

ܥܲܠ ܚܲܝܸ̈ܐ ܕܚܲܣܝܵܐ ܡܵܪܝ ܝܵܘܣܹܦ ܚܢܢܝܼܫܘܿܥ
ܡܝܼܛܪܵܦܘܿܠܸܝܛܵܐ

ܥܲܣܩܵܐ ܝ݉ܠܵܗܿ ܕܗܲܡܙܹܡܹܢ ܟܠ ܡܹܢܕܝܼ ܐܲܝܟܼ ܕܝܼܠܗ ܣܵܒܲܒ ܥܘܼܠܘܿܠ ܝܼܠܵܗ ܡܼܢ ܚܲܝܠܝܼ ܘܦܲܪܡܲܝܬܝܼ.

ܐܲܝܟܵܐ ܡܵܨܹܢ ܕܗܲܡܙܹܡܹܢ ܥܠ ܢܹܨܚܵܢܸ̈ܐ ܕܗܿܘ ܕܡܣܘܼܩܠܸܗ ܗ݉ܘܵܐ ܠܩܢܘܿܡܸܗ ܒܩܲܕܝܼܫܘܼܬܵܐ ܘܕܘܼܒܵܪܸܗ ܒܕܹܟܼܝܘܼܬܵܐ ܘܚܲܝܸܗ ܒܗܲܝܡܵܢܘܼܬܵܐ. ܓܵܘ ܙܲܒܼܢܵܐ ܕܚܝܸܐ ܠܸܗ ܓܵܘܸܗ ܐܵܗܵܐ ܩܲܕܝܼܫܵܐ ܚܲܟ̰ܵܐ ܝܼܠܵܗ ܐܹܢ ܡܲܕܡܹܚܠܸܗ ܠܡܘܼܫܸܐ ܢܒܼܝܼܵܐ ܒܡܲܟܿܝܼܟܼܘܼܬܸܗ : ܘܠܲܐܒܼܪܵܗܲܡ ܒܗܲܝܡܵܢܘܼܬܸܗ : ܘܠܐܝܼܘܒܼ ܒܚܘܼܡܣܢܗ : ܘܠܝܵܘܣܹܦ ܒܢܲܟܼܦܘܼܬܸܗ : ܨܲܝܵܡܵܐ ܡܼܢ ܠܹܒܵܐ : ܚܲܟܝܼܡܵܐ ܩܵܐ ܝܲܗܒܲܠܬܵܐ ܕܓ̰ܘܼܒܲܒܿ : ܝܲܗܒܼܵܢܵܐ ܕܠܹܒܵܐ ܩܵܐ ܙܲܕܥܘܼܘܵܢܸ̈ܐ : ܚܲܠܹܢܵܢܵܐ ܕܙܲܒܿܘܼܢܸܐ : ܡܲܦܨܹܚܵܢܵܐ ܕܦܫܝܼܡܸ̈ܐ : ܡܒܲܣܡܵܢܵܐ ܕܟܠ ܬܗܪ ܕܡܲܪ̈ܥܸܐ ܕܦܲܓܼܪܵܐ ܘܪܘܼܚܵܐ : ܘܦܲܚܠܵܢܵܐ ܠܐܵܢܝܼ ܕܥܲܒܼܕܝܼ ܗ݉ܘܘ ܓܢܵܗܵܐ ܒܝܼܗ ܀

ܟܲܕ ܡܹܠܲܬܲܢ ܡܛܸܠܵܗ ܠܗܪܝܪ ܒܫܹܢ݉ܬܵܐ ܕ1927 ܡܫܘܼܪܸܐ ܠܗܘܿܢ ܒܢܵܝܵܐ ܒܲܬܘܵܬܸ̈ܐ ܘܡܲܪܝܘܼܙܸܐ ܚܲܝܲܝܗܝ ܩܵܐ ܡܹܬܚܵܐ ܕܚܲܡܫܵܐ ܫܹܢܸ̈ܐ ܩܲܕ݉ܡܵܝܸܐ. ܗܲܝܓܵܗܿ ܒܫܹܢ݉ܬܵܐ ܕ1932 ܡܢܵܚܵܐ ܡܵܪܝ ܝܵܘܣܹܦ ܡܫܘܼܬܼܐܹܣܠܸܗ ܡܲܕܪܲܫܬܵܐ ܩܵܐ ܡܩܪܝܬܵܐ ܕܠܹܫܵܢܵܐ ܐܵܬܼܘܿܪܵܝܵܐ : ܘܡܲܩܪܲܝܬܵܐ ܝܼܗ݉ܘܵܐ ܝܘܿܡܵܐܝܼܬ ܡܼܢ 8-12 : ܘܡܼܢ 1-4. ܘܩܵܐ ܟܠܣܵܐ ܕܓܘܼܪܸ̈ܐ ܕܲܪ̈ܣܵܬܸܐ ܕܥܵܪܵܒܝܼ، ܐܹܢܓܠܝܼܣ ܘܐܵܪܸܬܼܡܵܛܝܼܩܝܼ. ܩܵܢܘܿܢܵܐܝܼܬ ܟܸܐ ܦܲܝܫܝܼ ܗ݉ܘܵܘ ܡܘܼܩܪܝܼܸܐ ܘܐܵܗܵܐ ܝܼܘܵܐ ܬܚܘܼܬ ܡܕܲܒܪܵܢܘܼܬܵܐ ܒܫܹܢ݉ܬܵܐ ܕ1930 ܡܘܼܒܿܢܸܠܸܗ ܠܥܘܼܡܪܵܐ.

ܘܝܼܘܵܐ ܒܫܹܢ݉ܬܵܐ ܕ1930 ܡܘܼܒܿܢܸܠܸܗ ܠܥܘܼܡܪܵܐ ܫܵܦܝܼܪܵܐ ܕܡܵܪܝ ܝܘܿܚܲܢܲܢ ܡܲܥܡܕܵܢܵܐ. ܘܡܘܼܪܝܹܙܠܸܗ ܟܠܵܣܸܐ ܕܡܙܲܡܪ̈ܵܢܸܐ ܡܼܢ ܩܵܪ̈ܘܿܝܸܐ ܘܗ̤ܘܦܲܕܼܝܲܩܢܸ̈ܐ ܘܫܲܡܵܫܸ̈ܐ. ܘܟܠܲܝܗܝ ܟܸܐ ܫܲܪܟܿܝܼ ܗ݉ܘܵܘ ܓܵܘ ܨܠܘܿܬܼܵܐ ܕܠܹܠܝܵܐ ܘܨܲܦܪܵܐ ܘܪܲܡܫܵܐ ܩܵܢܘܿܢܵܐܝܼܬ. ܘܡܢܵܚܵܐ ܡܵܪܝ ܝܵܘܣܹܦ ܟܠܝܘܿܡ ܝܼܘܵܐ ܒܪܸܫܵܐ ܕܬܹܫܡܹܫܬܵܐ ܕܠܹܠܝܵܐ ܡܼܢ ܩܲܕ݉ܡ ܩܵܪ̈ܘܿܝܸܐ ܘܫܵܡܵܫܸ̈ܐ. ܘܗܿܘ ܟܸܐ ܡܫܵܪܸܐ ܗ݉ܘܵܐ ܠܵܗܿ ܨܠܘܿܬܼܵܐ. ܘܛܘܼܦ̮ܣܵܐ ܒܓܵܢܸܗ ܟܸܐ ܡܲܚܙܸܐ ܗ݉ܘܵܐ ܩܵܐ ܥܲܠܡܵܐ. ܠܵܐ ܗ݉ܘܲܬ݉ ܐܲܚܟ̰ܝܼ ܒܗܸܡܹܙܡܲܢ. ܘܡܼܢ ܒܲܬ݉ܪ ܒܢܲܝܬܵܐ ܕܥܘܼܡܪܵܐ ܕܗܲܪܝܼܪ. ܡܘܼܒܿܢܸܠܸܗ ܥܘܼܡܪܵܐ ܐ݉ܚܪܸܢܵܐ ܚܲܕܬܵܐ ܓܵܘ ܒܵܬܵܣܸܐ. ܥܲܠ ܫܹܡܵܐ ܕܡܵܪܝ ܫܹܡܥܘܿܢ ܒܲܬ݉ܪ ܨܲܒܵܥܸܐ. ܩܵܬܼܘܿܠܝܼܩܵܐ ܘܣܲܗܕܵܐ ܕܥܸܕܬܵܐ ܕܡܲܕܢ̱ܚܵܐ. ܘܡܼܢ ܒܲܬ݉ܪ ܫܘܼܢܵܝܵܐ ܕܡܢܵܚܵܐ ܩܲܫܝܼܫܵܐ ܥܲܒܼܕܝܼܫܘܿܥ ܟܵܗܢܵܐ ܕܡܲܪܥܝܼܬܵܐ ܕܡܵܬܵܣܸܐ. ܒܫܹܢ݉ܬܵܐ 1936 ܦܪܹܫܠܸܗ ܠܡܫܲܡܫܵܢܵܐ ܐܲܚܝܼܩܲܪ ܗܵܓ̰ܝܼ ܚܲܕ݉ ܡܼܢ ܡܫܲܡܫܵܢܸ̈ܐ ܕܥܸܕܬܵܐ ܕܗܵܪܝܼܪ ܘܡܲܠܦܵܢܵܐ. ܘܣܝܼܡܠܸܗ ܩܵܫܵܐ ܩܵܐ ܥܘܼܡܪܵܐ ܕܡܵܪܝ ܫܹܡܥܘܿܢ ܒܲܬ݉ܪ ܨܲܒܵܥܸܐ. ܩܵܐ ܒܵܬܵܣܸܐ ܘܡܲܬܘܵܬܸ̈ܐ ܕܚܲܕܹܪܘܵܢܘܿܗܿ. ܘܒܫܹܢ݉ܬܵܐ 1941 ܒܥܹܕܵܢܵܐ ܕܣܲܚܒܲܪܬܵܐ ܕܛܘܼܒܼܬܵܢܘܼܬܸܗ ܠܚܲܝܠܵܘܵܬܸ̈ܐ ܕܠܹܒܼܝܼ ܕܓܵܘ ܡܲܫܪܝܼܬܵܐ ܕܫܵܥܸܝܒܵܐ : ܘܒܲܨܪܵܐ : ܘܥܵܒܵܕܲܐܢ. ܚܙܸܠܸܗ ܕܐܝܼܬ ܗ݉ܘܵܐ ܪܵܒܵܐ ܡܼܢ ܒܢܲܝ̈ ܥܸܕܬܲܢ ܒܹܚܵܝܵܐ ܬܵܡܵܐ ܕܣܢܝܼܩܸܐ ܗ݉ܘܵܘ ܠܟܵܗܢܸ̈ܐ ܘܚܲܕ݉ ܡܹܢܝܵܢܵܐ ܩܵܐ ܥܸܕܬܵܐ. ܘܬܵܡܵܐ ܬܦܩܠܗ ܒܡܫܬܐܠܵܢܵܐ ܕܡܐܢܐ ܕܒܨܪܐ ܘܚܲܕ݉ܟܡܐ ܡܢܝܗܝ ܝܼܗ݉ܘܘ ܕܘܣܬ̈ܐ ܡܗܘܡܢܐ ܕܛܘܼܒܼܬܵܢܘܼܬܸܗ ܦܝܫܠܗ ܝܘܗܒܼܐ ܩܬܝܗܝ ܚܲܕ݉ ܒܢܝܵܢܵܐ ܫܦܝܪܐ ܓܘ ܚܕܐ ܕܪܬܐ ܪܘܝܼܚܬܵܐ ܡܪܬ ܐܝܠܢ̈ܐ ܘܩܝܼܢܘܼܬܵܐ. ܕܒܣܐ ܡܠܝܐ ܗ݉ܘܐ ܩܐ ܒܝܬܐ ܕܨܠܘܿܬܵܐ. ܘܥܡܪܬܐ ܕܚܲܕ݉ ܟܗܢܐ ܘܟܠܦܬܘܗܝ ܩܐ ܕܗܿܝ ܥܕܢܐ. ܘܐܘܼܦ ܓܘ ܡܲܫܪܝܼܬܐ ܕܫܥܝܒܐ ܒܡܨܥܝܘܬܐ ܘܟܼܠܝܫ ܕܚܟܡܐ ܐܦܝܣܝܪ̈ܐ ܕܚܝܠܘܬܐ ܕܗܘܐ. ܒܢܝ̈ ܐܘܡܬܢ ܦܠܚܐ ܓܘ ܡܫܪܝܼܬܐ ܕܫܥܝܒܐ ܡܨܐ ܠܗܘܢ ܕܒܢܝ ܗܘܘ ܫܡܐ ܕܡܪܝ ܒܢܝܡܝܢ ܩܬܘܠܝܩܐ ܘܣܗܕܐ ܘܬܡܐ ܐܝܬ ܗ݉ܘܐ ܠܢ ܐܝܟܼ 30 ܟܠܦܬ̈ܐ ܒܢܝ̈ ܥܕܬܢ ܕܡܓ̰ܝܕ ܪܒܐ ܩܝܪܬ ܝܼܘܵܘ ܟܠܝܗܝ : ܘܐܗܐ ܥܘܡܪܐ ܦܫܠܗ ܦܬܝܼܚܐ 1943 ܘܡܢܚܐ ܩܫܝܫܐ ܐܚܝܩܪ ܦܫܠܗ ܡܫܘܢܝܐ ܠܒܨܪܐ ܠܡܕܒܘܪܐ ܠܐܢܝ ܡܪܥܝܼܬܐ. ܘܐܝܼܘܵܐ ܒܢܣܝܼܗܬ̈ܐ ܐܲܒܼܗܝ̈ܐ ܕܡܢܚܐ ܡܪܝ ܝܘܣܦ ܘܒܓ̰ܘܪܐܬ ܕܡܢܗ ܦܫܠܗ ܒܢܝܵܐ ܥܘܼܡܪܐ ܕܡܪܝ ܩܪܕܓܼ ܣܗܕܐ ܓܘ ܟܡܦܐ ܕܓܝܠܢܝ ܒܓܼܕܕ ܒܡܩܝܡܬܐ ܕܐܢܫܐ ܡܗܘܡܢ̈ܐ ܐܢܝ ܕܫܡܢܝܗܝ ܦܝܫܐ ܝ݉ܢܐ ܝ݉ܕܥܝܐ ܓܘ ܡܗܘܡܢ̈ܐ ܕܗܿܝ ܡܪܥܝܬܐ. ܘܫܡܫܐ ܓܒܼܪܝܐܝܠ ܣܘܠܝܡܢ ܦܫܠܗ ܣܝܡܐ ܩܫܐ ܒܫܢܬ 1950 ܩܐ ܥܘܡܪܐ ܥܗܝܼܕܐ ܗܕܟܼܐ ܗܿܘ ܥܡ ܡܢܚܐ ܩܫܝܫܐ ܦܘܠܘܣ ܕܩܠܝܬܐ ܟܐ ܥܒܼܕܝܼ ܗ݉ܘܘ ܚܠܡܬ ܩܐ ܟܡܦܐ ܘܬܠ ܡܚܡܕ : ܘܒܓܼܕܕ ܚܕܬܐ ܗܠ ܕܦܫܠܗܘܢ ܣܝܡܐ ܟܗܢ̈ܐ ܩܐ ܕܐܢܝ ܡܪ̈ܥܝܬܐ ܘܠܐ ܝ݉ܠܗ ܛܫܝܼܬܐ ܡܼܢ ܥܕܬܢܝ̈ܐ ܫܪܝܼܪ̈ܐ ܘܐܘܼܡܬܢܝܐ ܚܩܝܼܪ̈ܐ. ܕܡܣܚܒܪ̈ܝܬܐ ܕܒܬܪ ܐܚܕܕܐ ܕܥܒܼܕܠܗ ܡܢܚܐ ܡܪܝ ܝܘܣܦ ܠܡܪܥܝܬܐ ܡܫܡܗܬܐ ܕܟܪܟܘܟ ܥܠ ܢܝܫܐ ܕܚܠܢܬܐ ܕܓ̰ܘܪܐܬ ܕܒܢܘܿܢ̈ܐ ܕܡܪܥܝܬܐ ܩܐ ܒܢܝܬܐ ܕܚܕܐ ܡܕܪܫܬܐ ܘܚܕܐ ܥܕܬܐ ܩܐ ܡܪܥܝܬܐ ܓܘܪܬܐ ܕܟܪܟܘܟ. ܚܵܕܲܪܝܵܐ ܟܠܝܫܐ ܦܫܠܗܘܢ ܥܒܼܝܼܕܐ. ܘܥܡ ܕܐܢܐ ܟܠܝܫܐ ܝܼܘܐ ܡܪܝܚܬܐ ܕܒܢܐ ܘܡܲܟܝܼܟܼܘܼܬܼܵܐ ܘܚܘܼܒܵܐ. ܒܗܲܕܟܼܵܐ ܡܨܐ ܠܗܘܿܢ ܠܓܼܠܒܐ ܠܥܣܩܝܬ̈ܐ ܘܕܪܩܘܒܼܠܘܼܝܬ̈ܐ ܕܒܬܦܩܐ ܗ݉ܘܵܘ ܩܕܡ ܐܘܼܪܚܝܗܝ ܒܗܿܝ ܥܕܢܐ. ܗܕܟܼܐ ܒܡܨܝܬܬܐ ܕܡܗܘܼܡܢ̈ܐ ܒܢܝ̈ ܡܪܥܝܬܐ ܟܠܢܐܝܬ. ܘܒܛܢܢܐ ܕܦܪ̈ܨܘܦܐ ܐܘܡܪܢܝ̈ܐ ܦܪܝܼܫܐܝܬ ܦܫܠܗ ܙܒܼܝܢܐ ܚܲܕ݉ ܒܹܢܝܵܢܵܐ ܓܘܪܐ ܩܐ ܡܕܪܫܬܐ : ܘܗܪ ܒܗܝ ܥܕܢܐ ܦܫܠܗ ܡܘܦܠܚܐ ܐܘܿܦ ܩܐ ܨܠܘܿܬܐ ܗܠ ܕܒܢܸܐ ܠܗ݉ܘܢ ܥܘܡܪܐ ܫܦܝܪܐ ܕܡܪܝ ܓܝܼܘܲܪܓܝܼܣ ܣܗܕܐ. ܘܦܫܠܗ ܦܬܝܼܚܵܐ ܒܚܕ ܙܘܝܚܐ ܪܒܐ ܓܘܪܐ ܪܘܫܡܐܝܬ ܒܗܕܝܪܘܬܐ ܕܡܝܩܪ̈ܐ ܒܢܝ̈ ܐܘܡܬܢ ܘܡܕܢܪ̈ܢܐ ܕܫܘܠܛܢܐ ܕܐܘܚܕܢܐ ܕܟܪܟܘܟ. ܘܦܫܠܗ ܣܝܡܐ ܒܝܕ ܛܘܼܒܼܬܢܘܬܗ ܡܢܚܐ ܡܪܝ ܝܘܣܦ : ܡܕܒܚܐ ܘܩܕܘܿܫ ܩܘܼܕܫܐ ܦܫܠܗ ܡܘܠܚܡܐ ܒܗܿܘ ܦܨܠܐ ܕܥܘܼܡܪܐ ܡܫܡܗܐ ܕܡܪܝ ܝܼܫܘܿܥ ܕܒܝܬ ܡܪܝ ܚܢܢܝܫܘܿܥ ܕܢܘܟ̰ܝܼܵܐ ܕܒܐܬܪܐ ܒܪܝܼܟܼܐ ܕܫܡܙܕܝܢ.

ܡܢܚܐ ܪܒܐ ܒܚܡ ܝܼܘܐ ܥܠ ܟܠܝܗܝ ܣܢܝܼܩܘܼܝܬ̈ܐ ܕܒܢܝ̈ ܡܠܬܢ ܒܟܠ ܕܘܟܬܐ ܕܝܼܗ݉ܘܵܘ ܘܟܸܐ ܪܵܥܸܫ ܒܐܗܘܹܠ ܐܹܩܘܼܢܘܿܡܝܼܝܵܐ. ܘܒܝܼܕܥܝܐ ܗ݉ܘܵܐ ܕܦܘܼܪܥܵܢܵܐ ܕܗܲܕܡܵܝܘܿܬܐ ܕܥܸܕܬܵܐ : ܕܚܲܕ݉ܟܿܡܵܐ ܐܢܫܐ ܝ݉ܠܗ ܐܲܚܟ̰ܝܼ ܘܠܵܐ ܕܟܠܝܗܝ ܦܵܠܵܚܸ̈ܐ ܒܢܝ̈ ܡܹܠܲܬ. ܘܐܢܝܼ ܕܫܩܝܼܠܸܗ ܗ݉ܘܵܘ ܝܘܼܩܪܐ ܕܦܹܠܚܵܢܵܐ ܓܘ ܥܕܬܐ : ܗܵܪ ܐܵܢܝܼ ܝܼܢܵܐ ܓܘ ܡܲܝܕܲܢ. ܘܟܡܵܐ ܕܡܪ̈ܥܝܬܐ ܒܙܝܕܐ ܗ݉ܘܵܘ ܐܘܿܦ ܡܲܨܪ̈ܦܸܐ ܒܙܝܵܕܵܐ ܗ݉ܘܵܘ. ܒܘܼܬ ܐܵܗܵܐ ܩܪܸܠܸܗ ܚܲܕ݉ ܟܢܘܼܫܝܵܐ ܓܵܘܵܢܵܝܵܐ ܕܟܠܝܗܝ ܣܝܥܬ̈ܐ ܕܡܲܪ̈ܥܝܬܸܐ ܕܥܸܪܵܩ ܓܘ ܒܓܼܕܕ ܠܡܲܩܝܘܼܡܸܐ ܚܕܵܐ ܣܝܥܬܵܐ ܩܹܢܛܪܘܼܢܲܝܬܵܐ ܘܗܲܕܡܘܿܗ ܗܵܘܝܼ ܡܼܢ ܓܘ ܣܝܥܵܬ̈ܐ ܕܥܸܕܬܵܐ. ܕܒܓܼܕܕ : ܘܟܲܪܟܘܟ : ܘܒܨܪܐ : ܘܗܒܢܝܐ. ܘܟܠ ܣܝܼܥܬܐ ܡܫܕܪܐ ܡܼܢ ܕܗܿܘ ܡܢܕܝܼ ܕܙܵܝܹܕ ܡܼܢ ܡܲܨܪ̈ܦܸܐ ܕܡܪܥܝܬܘܼܗܿ ܩܵܐ ܕܐܵܗܵܐ ܣܝܥܬܐ ܩܢܛܪܘܢܝܬܐ. ܘܡܼܢ ܬܵܡܵܐ ܦܝܼܫܝ ܦܹܪܥܝܸܐ ܡܘܼܥܵܫܸ̈ܐ ܩܵܐ ܟܗܢ̈ܐ ܕܓܵܘ ܡܲܬܿܘܵܬܸ̈ܐ. ܐܝܼܢܵܐ ܐܵܗܵܐ ܚܝܼܵܠ ܠܵܐ ܦܹܫܠܗ ܡܩܘܼܒܹܠܬܵܐ ܒܗܲܕܡܸ̈ܐ ܕܚܲܕ݉ܟܿܡܵܐ ܡܼܢ ܣܝܼܥܵܬ̈ܐ : ܗܲܕܟܼܵܐ ܗܘܸܠܵܗܿ ܡܹܬܿܡܲܨܝܵܢܝܼܬܼܵܐ ܠܡܲܩܝܘܼܡܸ̈ܐ ܣܝܥܬܐ ܩܹܢܛܪܘܿܢܲܝܬܵܐ ܒܗܿܝ ܥܕܵܢܵܐ.

ܡܢܵܚܵܐ ܡܪܝ ܝܘܣܦ : ܗܡܙܡܢܗ ܘܢܣܝܼܗܬܗ ܐܲܒܼܗܝ̈ܐ ܦܪܝܼܣܵܐ ܗ݉ܘܵܐ ܐܲܝܟܼ ܨܘܼܦܪܐ ܩܕܡ ܟܠܝܗܝ ܒܢܝ̈ ܡܠܬܗ ܘܗܿܘ ܕܒܵܣܡܵܐ ܗ݉ܘܵܐ ܠܸܗ ܕܬܲܪܣܸܐ ܗ݉ܘܵܐ ܠܵܗܿ ܓܵܢܸܗ ܚܸܐܪܵܐ ܗ݉ܘܵܐ. ܘܗܿܘ ܕܠܸܐ ܒܲܥܝܸܐ ܗ݉ܘܵܐ ܗܿܘ ܝܼܘܵܐ ܕܦܵܐܹܫ ܗ݉ܘܵܐ ܠܝܼܡܵܐ.

ܒܫܸܢ݉ܬܵܐ ܕ1958 ܬܘܼܚܡܹܢܸܗ ܠܡܲܩܝܘܼܡܸܐ ܚܕܵܐ ܣܝܼܥܬܵܐ ܒܐܘܼܪܚܵܐ ܕܓܵܢܸܗ. ܕܗܵܘܝܵܐ ܣܝܥܬܐ ܩܵܢܘܿܢܲܝܬܵܐ ܒܫܹܡܵܐ ܕܣܝܼܥܬܵܐ ܕܥܘܼܕܪ̈ܢܐ : ܩܐ ܕܐܵܗܵܐ ܬܦܹܩܠܸܗ ܒܘܵܙܝܼܪ ܕܕܵܚܠܝܼܵܐ. ܘܒܡܘܼܬܵܣܲܪܹܦܼ ܕܟܲܪܟܘܟ : ܘܫܩܹܠܸܗ ܦܣܵܣܵܐ ܕܡܲܩܝܹܡ ܡܼܢ ܦܲܪܨܘܦܸܐ ܥܵܒܼܘܿܕܸܐ ܡܲܨܝܵܢܸܐ ܕܡܲܬܒܼܝܼ ܩܵܢܘܿܢܸ̈ܐ ܫܲܬܐܹܣܵܝܸ̈ܐ ܩܵܐ ܡܕܲܒܪܵܢܘܼܬܵܐ ܕܐܗܐ ܣܝܼܥܬܐ. ܘܩܹܢܛܪܘܿܢ ܕܝܼܗܿ ܗܘܸܠܸܗ ܓܵܘ ܟܲܪܟܘܟ. ܘܒܐ݉ܚܲܪܬܵܐ ܦܹܫܠܗ ܡܫܘܼܬܹܐܣܵܐ ܚܲܕ݉ ܦܲܥܘܵܐ ܐܚܪܢܵܐ ܓܘ ܒܲܓܼܕܕ ܘܡܕܲܒܿܪܵܢܵܐ ܕܐܝܼܩܵܪܵܐ ܝܼܘܵܐ ܡܢܵܚܵܐ ܡܪܝ ܝܵܘܣܹܦ ܒܓܵܢܸܗ. ܝܘܼܬܪܵܢܵܐ ܘܗܲܝܪܝܬ̈ܐ ܕܐܗܐ ܓ̰ܡܥܝܼܵܐ ܦܝܼܫܸܐ ܝ݉ܕܥܝܐ ܩܐ ܟܠܝܗܝ ܐ݉ܢܵܫܸܐ : ܘܒܐܹܡܵܝܸܐ ܡܼܢ ܣܢܝܼܩܸ̈ܐ ܕܒܿܢܝ̈ ܡܹܠܲܬܲܢ ܕܓܘ ܓܪܒܝܐ ܕܥܸܪܵܩ ܦܝܼܫܐ ܗܘܼܝܹܪܸܐ ܙܘܼܙܵܢܵܐܝܼܬ. ܘܡܼܢ ܡܵܝܲܪ̈ܝܵܬܸܐ ܕܐܗܐ ܣܝܼܥܬܐ ܕܥܘܼܕܪܢܐ ܦܫܠܗ ܡܘܩܝܡܬܐ ܚܕܵܐ ܡܕܪܫܬܐ ܥܕܬܢܲܝܬܵܐ. ܘܦܝܼܫܸܐ ܗ݉ܘܵܘ ܬܘܼܓܒܹܪܸ̈ܐ ܓܵܘܵܗ ܫܬܵܐ ܐܹܣܟܘܼܠܝ̈ܐ ܒܠܒܼܝܼܫܝܵܬܸ̈ܐ. ܘܐ݉ܟܼܠܬܵܐ ܘܫܬܝܬܐ ܘܕܡܲܟܼܬܐ ܘܟܠ ܣܢܝܼܩܘܼܬܐ ܒܗܲܝܲܪܬܵܐ ܘܟ̰ܵܠܝܼܫܸܐ ܐܲܡܝܼܢܵܝܸ̈ܐ ܕܡܢܵܚܵܐ ܡܪܝ ܝܵܘܣܹܦ. ܒܐ݉ܚܵܪܬܵܐ ܒܫܹܢ݉ܬܵܐ 1969 ܐܗܐ ܓ̰ܡܥܝܐ ܦܹܫܠܵܗܿ ܡܘܕܒܹܪܬܐ : ܘܙܘܙܗܿ ܘܡܹܢܕܝܼ ܕܐܝܬ ܗ݉ܘܵܠܗ ܦܝܼܫܠܗ ܫܩܝܼܠܵܐ ܒܗܘܼܟܿܡܵܐ.
ܒܫܹܢ݉ܬܵܐ ܕ1958 ܡܢܚܐ ܡܪܝ ܝܘܣܦ ܒܥܕܢܐ ܕܣܚܒܪܬܗ ܠܒܢܝ̈ ܡܠܬܢ ܕܓܘ ܐܬܪܐ ܕܦܪ̈ܣܝܐ ܚܙܠܗ ܕܠܝܬܠܗܘܢ ܦܝܫܐ ܟܗܢ̈ܐ ܡܲܠܝܢ̈ܐ ܩܐ ܡܕܒܪܢܘܬܐ ܕܡܲܪ̈ܥܝܬܐ ܕܒܢܝ̈ ܥܕܬܢ. ܘܐܗܐ ܡܣܚܒܪܬܐ ܗܘܠܗ ܡܼܢ ܒܬܪ ܕܐܗܘܠܬܐ ܦܘܼܠܘܼܛܝܼܩܵܝܸܐ ܠܐ ܗܘܝܪܘܢ ܩܐ ܡܢܚܐ ܡܪܝ ܝܘܚܢܢ ܦܝܼܠܝܼܦܘܿܣ ܕܐܙܠ ܗ݉ܘܵܐ ܩܐ ܕܗܿܘ ܐܬܪܐ : ܪܚܫܠܗ ܦܪܨܘܦܐܝܼܬ ܒܓܢܗ ܐܝܟܼ ܩܲܝܘܿܡܵܐ ܦܛܪܝܪܟܝܐ. ܘܟܕ ܚܙܠܗ ܕܥܕܬܐ ܣܢܝܼܩܬܐ ܗ݉ܘܐ ܠܟܢ̈ܐ ܘܡܕܒܪ̈ܢܐ. ܪܫܡܠܗ ܠܩܫܝܫܐ ܚܢܢܝܐ ܕܢܚܐ ܕܝܼܗ݉ܘܵܐ ܟܗܢܐ ܡܥܕܪܢܐ ܓܘ ܥܕܬܐ ܕܗܪܝܼܪ : ܘܢܛܪ ܐ݉ܪ̈ܙܐ ܕܛܘܼܒܼܬܢܘܼܬܗ ܓܘ ܟܠܗܿ ܥܝܪܢ : ܘܡܫܢ݉ܬܐ ܕ1962 ܦܫܠܗ ܣܝܡܐ ܐܦܣܩܘܿܦܐ ܒܫܡܐ ܕܡܪܝ ܕܢܚܐ ܒܝܕ ܡܢܚܐ ܡܪܝ ܐܝܫܝ ܫܡܥܘܿܢ ܦܵܛܲܪܝܲܪܟܵܐ ܒܥܹܕܵܢܵܐ ܕܣܲܚܒܲܪܬܸܗ ܠܐܬܪܐ ܕܥܝܼܪܵܢ.

ܡܢܵܚܵܐ ܡܵܪܝ ܝܵܘܣܹܦ ܟܬܹܒܼܠܸܗ ܩܵܐ ܐܲܦܹܣܩܘܿܦܵܐ ܚܲܕܬܵܐ ܡܵܪܝ ܕܢܚܐ ܚܲܕ݉ ܟܬܵܒܼܵܐ ܕܣܝܵܡܝܼܕܵܐ ܘܓܵܘ ܕܗܿܘ ܟܬܼܵܒܼܵܐ ܡܘܼܠܚܹܡܠܸܗ ܬܲܪܬܹܝ ܨܠܵܘܵܬܸ̈ܐ ܕܒܿܘܼܪܟܵܬܸܐ ܕܥܲܠ ܐܲܦܹܣܩܘܿܦܵܐ ܒܫܹܡܵܐ ܕܕܹܢܚܵܐ ܘܐܲܝܟܼ ܢܒܼܝܼܘܼܬܵܐ ܕܢܒܼܝܼܸ̈ܐ ܦܹܫܠܗܘܿܢ ܬܘܼܡܹܡܸܐ ܥܲܠ ܡܵܪܝ ܕܢܚܐ ܒܥܕܵܢܵܐ ܕܦܹܫܠܸܗ ܡܘܼܪܡܵܐ ܠܕܲܪܓܼܵܐ ܡܥܲܠܝܵܐ ܕܦܵܛܲܪܝܲܪܟܿܘܼܬܼܵܐ.

ܓܵܘ ܡܹܐܡܪܵܐ ܩܲܕ݉ܡܵܝܵܐ ܗܲܕܟܼܵܐ ܝ݉ܠܸܗ ܡܸܐܡܵܪܵܐ :
ܡܫܝܼܚܵܐ ܐܲܠܵܗܲܢ ܘܡܵܪܲܢ : ܡܲܠܟܲܢܢ ܘܣܲܒܼܪܲܢ ܘܫܘܼܒܼܗܵܪܲܢ. ܓܵܒܹܬܠܸܗ ܕܹܢܚܵܐ ܚܲܒܼܪܲܢ : ܕܗܵܘܸܐ ܪܵܥܝܵܐ ܘܲܡܕܲܒܪܢ. ܠܡܲܪ̈ܥܝܵܬܸܐ ܕܒܐܲܬܪܵܐ ܕܥܝܼܪܢ : ܘܓܵܘ ܡܕܝܼܢ݉ܬܵܐ ܪܲܒܬܵܐ ܬܹܗܪܢ. ܘܢܹܪܥܸܐ ܓܙܵܪܸ̈ܐ ܕܡܒܲܕܪܢ : ܒܲܡܕܝܼܢܵܬ̈ܐ ܘܐܲܬܼܪܵܘܵܢ.

ܓܵܘ ܡܹܐܡܪܵܐ ܕܬܪܸܝܢ ܗܲܕܟܼܵܐ ܝ݉ܠܸܗ ܡܸܐܡܵܪܵܐ :
ܚܘܿܪ ܒܥܲܒܼܕܵܟܼ ܕܲܫܡܸܗ ܕܹܢܚܵܐ : ܘܲܥܒܼܕܲܝܗܝ ܢܘܼܗܪܵܐ ܘܡܹܠܚܵܐ ܘܫܲܒܼܙܹܒܲܝܗܝ ܡܼܢ ܕܵܠܘܿܚܵܐ : ܐܵܟܹܠܩܲܪܨܵܐ ܡܲܪܚܵܐ. ܘܢܹܗܘܸܐ ܡܲܟܝܼܟܼܵܐ ܘܢܝܼܚܵܐ : ܘܡܫܲܒܿܠܵܢܵܐ ܘܢܲܨܝܼܚܵܐ. ܘܢܹܪܥܸܐ ܠܥܵܢܵܟܼ ܒܲܢܝܵܚܵܐ : ܘܐܲܘܝܘܼܬܼܵܐ ܘܚܘܼܒܵܐ ܚܘܼܝܵܕܵܐ.

ܗܲܕܟܼܵܐ ܢܒܼܝܼܘܼܬܗ ܕܥܠ ܡܪܝ ܕܢܚܐ ܦܹܫܠܵܗ ܬܘܼܡܹܡܬܵܐ. ܕܹܟܼܝܵܐ ܗ݉ܘܵܐ ܒܢܙܝܼܪܘܼܬܸܗ : ܘܪܲܒܵܐ ܒܫܘܼܠܛܵܢ ܟܵܗܢܘܼܬܸܗ. ܕܠܲܝܬ ܗ݉ܘܵܐ ܫܹܟ ܒܗܲܝܡܵܢܘܼܬܸܗ : ܗܘܸܠܵܗ ܫܪܵܪܵܐ ܢܒܼܝܼܘܼܬܸܗ.

ܒܫܸܢ݉ܬܵܐ ܕ1963 ܒܗܓ̰ܬܐ ܕܩܘܡܝܬ̈ܐ ܡܲܦܫܹܡܵܢܸ̈ܐ ܕܓܲܪܒܿܝܵܐ ܕܥܸܪܵܩ ܟܠܲܝ ܒܢܲܝ̈ ܡܹܠܲܬܲܢ ܡܘܫܚܛܠܘܢ ܘܨܠܸܗ ܠܗܘܿܢ ܠܡܕܝܼܢ݉ܬܵܐ ܘܫܒܼܩܠܗܘܢ ܠܒܬܿܘܬܝܗܝ ܘܡܘܼܠܟܢܝܗܝ. ܘܥܪܒܝܗܝ ܘܩܢܝܢܝܗܝ ܦܫܠܗ݉ܘܿܢ ܣܠܝܒܐ. ܘܒܢܲܝ̈ ܗܪܝܪ ܘܒܬܣܐ. ܣܡܝܗܝ ܙܘܕܐ ܥܡܪܘܢ ܓܘ ܐܪܒܝܠ ܘܥܢܟܵܘܵܐ. ܘܐܢܝ ܐ݉ܚܪ̈ܢܐ ܢܚܬܠܗܘܢ ܠܟܪܟܘܟ ܘܒܓܼܕܕ. ܗܝܓܗܿ ܡܢܚܐ ܡܪܝ ܝܘܣܦ ܓܘ ܠܢܕܢ ܝܼܗ݉ܘܵܐ ܒܥܠܬܐ ܕܡܪܥܐ ܕܐܝܬܘܠܗ. ܘܐܝܼܡܢ ܕܕܪܗ ܠܥܪܩ ܘܚܙܠܗ ܠܐܢ̈ܐ ܩܘܡܝܬܐ ܕܡܵܫܚܛܘܼܬܵܐ ܕܒܢܲܝ̈ ܡܹܠܲܬܲܢ ܪܒܐ ܥܘܼܓ̰ܙܠܗ ܘܦܫܡܠܗ : ܡܫܘܪܐ ܠܸܗ ܦܓܼܪܘܗܝ ܒܹܢܘܵܠܵܐ ܘܦܝܵܫܵܐ ܙܲܒܘܿܢ. ܘܒܐܗܐ ܥܕܢܐ ܟܕ ܓܘ ܒܓܼܕܕ ܝܼܗ݉ܘܵܐ ܠܸܐ ܣܵܦܹܩ ܗ݉ܘܵܐ ܒܲܝܬܸܗ ܡܼܢ ܬܲܦܩܵܢܸ̈ܐ ܩܵܐ ܛܠܵܒܵܐ ܨܠܵܘܵܬܸ̈ܗ. ܘܒܘܪ̈ܟܬܐ ܡܹܢܸܗ ܗܲܠ ܝܵܘܡܵܐ ܕܫܘܼܢܵܝܸܗ.
ܒܚܕ ܡܼܢ ܝܘܡܢ̈ܐ ܟܕ ܝܼܬܼܒܼܐ ܝܼܘܚ ܗ݉ܘܵܐ ܓܘ ܕܪܬܐ ܕܒܝܬܝܗܝ ܐܢܐ ܘܗܿܘ ܒܢܦ̮ܫܢ ܡܫܘܼܪܐ ܠܗ ܒܝܬ ܠܗ ܠܢܦ̮ܫܐ ܗܡܙܘܡܐ ܗܕܟܼܐ.
ܫܒܼܝܼܩܝ ܝ݉ܠܗ ܐܠܗܐ ܓܘ ܕܐܗܐ ܡܬܚܐ ܕܡܪܥܝܼ ܘܥܓ̰ܙܬܝ ܕܝܗܒܢܘܿܟܼܘܿܢ ܒܘܪ̈ܟܬܐ ܝܢ ܠܵܐ ܡܼܢ ܓ̰ܠܕܐ ܥܕܢܝܼ ܡܛܝܬܐ ܝ݉ܠܗܿ. ܣܵܒܵܒ ܐ݉ܡܹܪܸܗ ܩܬܝ ܐܘܦ ܐܢܐ ܝܕܥܢ ܕܥܓ̰ܘܙܐ ܝ݉ܘܹܬ ܐܝܢܐ ܒܥܝܢ ܕܫܒܼܩܢܘܿܟܼ ܚܕܵܐ ܥܕܢܐ ܐ݉ܚܪܝܬܐ.

ܘܐܢܐ ܒܒܣܬܝܘܬܐ ܕܐܝܬ ܗ݉ܘܵܐ ܠܝܼ ܠܟܣܠܗ ܗܡܫܐ ܒܘܩܪܝ ܡܢܗ ܘܐܡܪܝ ܩܬܗ ܡܢܝ ܐܡܪܗ ܩܬܘܼܟܼ ܗܕܟܼܐ؟ ܓ̰ܘܒܼܒܠܗ ܘܐܡܪܗ ܐܠܗܐ ܐ݉ܡܪܗ ܩܬܝ ܗܕܟܼܐ. ܘܐܗܐ ܝܘܐ ܥܠܬܐ ܕܦܝܫܬܗ ܩܐ ܝܗܒܼܠܬܐ ܕܒܘܪ̈ܟܬܘܿܗ ܐ݉ܚܪܝܐ ܩܐ ܒܢܘܿܢ̈ܐ ܕܡܠܬܘܗܝ.

ܫܒܼܘܼܩ ܡܼܢ ܘܓ̰ܝܒܘܝܬ̈ܐ ܥܕܬܢܝ̈ܐ ܡܢܚܐ ܐܝܬ ܗ݉ܘܵܐ ܠܸܗ ܘܓ̰ܝܒܘܝܬ̈ܐ ܐ݉ܚܪ̈ܢܐ ܥܡ ܐ݉ܢܫ̈ܐ ܕܐܬܪܐ. ܦܝܫܐ ܗ݉ܘܵܐ ܝ݉ܕܥܝܐ ܓܘ ܟܠܗ ܐܬܪܐ ܕܐܪܒܝܠ ܘܚܕܪܘܢܘܗܝ ܡܼܢ ܡܘܫܠܡܢ̈ܐ ܘܡܫܝܼܚܝܐ ܐܝܟܼ ܚܲܕ݉ ܐ݉ܢܫܐ ܕܚܟܼܡܬܐ. ܘܛܵܒܼܵܐ ܘܩܲܕܝܼܫܵܐ ܟܸܐ ܚܲܫܒܼܝܼ ܗ݉ܘܵܐ ܠܸܗ : ܘܟܸܐ ܬܦܩܝ ܗ݉ܘܘ ܒܝܗ ܪܒܐ ܩܐ ܡܨܠܗܬ̈ܐ ܘܫܪ̈ܥܬܐ. ܘܛܠܒܬܐ ܕܒܘܪ̈ܟܬܐ ܡܢܗ. ܘܪܒܐ ܡܢܝ ܒܪܐܝܝܼ ܘܡܨܠܗܬ ܕܝܼܗ ܟܐ ܡܩܡܝ ܗ݉ܘܘ ܪ̈ܫܢܝܗܝ ܘܡܕܒܪܢܝܗܝ. ܘܗܿܝ ܫܪܥܬ ܕܗܿܘ ܩܛܥܐ ܗ݉ܘܠܗ ܦܝܼܫܬܐ ܗ݉ܘܬ ܡܩܘܒܲܠܬܐ ܒܟܠܝܗܝ. ܘܚܵܕܘܼܬܲܝ ܝܼܘܵܐ ܐܝܼܡܢ ܕܟܸܐ ܬܵܦܹܩ ܗ݉ܘܵܐ ܒܝܼܝܗܝ ܦܲܪܨܘܿܦܐܝܬ. ܒܐܝܩܵܪܵܐ ܡܥܓ̰ܒܢܐ ܟܐ ܩܲܒܠܝܼ ܗ݉ܘܵܠܸܐ. ܘܒܘܼܫ ܡܥܓ̰ܒܢܐ ܗ݉ܘܵܐ ܕܠܸܐ ܩܲܛܥܸܐ ܗ݉ܘܵܐ ܗܹܘܝܼ ܕܗܹܟ̰ ܐ݉ܢܵܫܵܐ.

ܗܲܕܟܼܐ ܗ݉ܘܵܐ ܚܲܝܸ̈ܐ ܕܐܗܐ ܡܕܲܒܪܢܐ ܚܲܟܿܝܼܡܵܐ ܘܪܫܢܐ ܡܥܲܠܝܵܐ ܕܡܢܵܚܵܐ ܡܪܝ ܝܵܘܣܹܦ. ܡܢܚܐ ܗܹܟ̰ ܠܸܐ ܒܵܛܹܠ ܗ݉ܘܵܐ ܡܼܢ ܝܗܒܼܠܬܐ ܕܢܣܝܗܬ̈ܐ ܘܒܘܪ̈ܟܬܐ ܐܲܒܼܗܝ̈ܐ ܘܨܠܘܿܬܵܐ ܩܐ ܒܢܘܿܢ̈ܐ ܕܡܠܬܘܿܗܝ ܗܲܠ ܝܵܘܡܵܐ ܐ݉ܚܵܪܵܝܵܐ ܕܒܝܼܗ ܡܫܘܿܢܸܐ ܠܸܗ ܠܟܹܣ ܡܵܪܸܗ. ܘܚܬܝܼܡܵܠܸܗ ܣܝܼܣܪܬܐ ܕܬܪܥܣܪ ܐܒܼܗܬ̈ܐ ܡܝܛܪܦܘܠܝܛܐ ܡܫܡܗ̈ܐ ܒܩܕܝܼܫܘܼܬܐ ܘܡܗܘܼܡܢܘܼܬܐ ܕܩܹܡܠܗܘܿܢ ܥܠ ܟܘܿܪܣܝܐ ܥܝܠܡܝܐ ܕܪܘܼܣܬܩܐ ܕܫܡܙܕܝܼܢ ܕܥܒܼܕܠܗܘܢ ܚܹܠܡܲܬ ܩܵܐ ܟܘܿܪܣܝܐ ܫܠܝܼܚܵܝܵܐ ܦܛܪܝܪܟܝܐ ܕܣܠܝܩ ܘܩܛܝܣܦܘܿܢ ܒܡܗܘܼܡܢܘܼܬܐ ܡܢܚܐ ܡܪܝ ܝܘܣܦ ܚܢܢܝܼܫܘܿܥ ܟܬܝܼܒܼܐ ܝܠܗ ܪܒܐ ܟܬܵܒܼܸܐ ܕܨܠܘܿܬܐ ܒܟܬܼܒܼܬܐ ܫܦܝܼܪܬܐ ܕܓܵܢܸܗ. ܐܝܟܼ ܛܟܼܣܐ ܕܐ݉ܪ̈ܙܐ : ܘܬܘܪܓܡܐ : ܘܫܠܝܼܚܵܐ : ܘܟܲܫܟܿܘܿܠ : ܘܬܫܥܝܬܐ ܕܥܠ ܐܘܡܬܐ. ܘܡܘܼܠܚܡܐ ܝ݉ܠܗ ܣܘܓܼܝܬ̈ܐ ܩܐ ܥܐܕܐ ܕܝܲܠܕܵܐ. ܘܩܝܲܡܬܵܐ. ܘܣܘܼܠܵܩܵܐ : ܘܫܪ : ܐܕܝܘܡ ܪܒܐ ܡܼܢ ܣܘܼܓܼܝܬ̈ܐ ܦܝܫܐ ܙܡܝܼܪ̈ܐ ܒܝܘܡܢ̈ܐ ܕܥܐܕܘܬ̈ܐ ܓܘ ܥܘܼܡܪ̈ܢܐ ܕܡܹܠܝܼܸܐ ܝ݉ܢܵܐ ܛܥܡܐ ܘܚܟܼܡܵܐ.

ܡܢܚܐ ܚܝܠܗ 84 ܫܢ̈ܐ. ܘܡܕܘܒܪܗ 68 ܫܢ̈ܐ. ܣܝܼܡܠܗ 51 ܩܫ̈ܐ، 211 ܫܡܫ̈ܐ، 6 ܐܦܣܩܘܿܦ̈ܐ، 4 ܐܪܟܕܝܩܘܼܢ̈ܐ، 6 ܗܘܼܦܕܝܩܢ̈ܐ. ܘܡܫܘܢܸܐ ܠܸܗ ܠܟܣ ܡܵܪܸܗ ܒܝܘܡܐ ܕܚܕܒܫܒܐ ܬܠܬܐ ܒܝܪܚܐ ܕܬܡܘܙ ܒܕܘܼܟܼܪܢܐ ܕܡܪܝ ܬܐܘܿܡܐ ܫܠܝܼܚܵܐ ܒܫܢܬ 1977 ܠܡܪܢ.

ܘܦܓܼܪܘܗܝ ܦܫܠܗ ܡܘܬܒܼܐ ܓܘ ܥܕܬܐ ܕܡܪܬܝ ܡܪܝܡ ܒܬܘܠܬܐ ܩܕܝܫܬܐ ܕܢܥܝܪܝܐ ܘܓܲܝܵܪܐ، ܒܓܼܕܕ. ܕܘܼܟܼܪܢܗ ܗܵܘܸܐ ܠܒܘܼܪܟܬܐ ܘܛܒܼܬܐ ܕܒܢܘܿܢ̈ܐ ܘܒܢܬ̈ܐ ܕܥܕܬܐ ܩܕܝܼܫܬܐ ܘܫܠܝܼܚܝܬܐ ܩܵܬܘܿܠܝܼܩܝܼ ܕܡܕܢ̱ܚܵܐ ܕܐܬܘܪ̈ܝܐ. ܐܡܝܢ ܀

ܒܝܕ ܩܫܝܫܐ ܝܵܘܢܵܢ ܒܲܪ ܩܫܝܫܐ ܝܘܿܐܸܝܠ ܐܪܟܕܝܩܘܢ
ܠܢܕܢ، ܐܢܓܠܢܕ.
ܚܙܝܼܪܢ ܝܚ ܒܗ
ܐܨܨܘ